كونفەرەنتسيانىڭ پلەنارلىق ماجىلىسىندە وبلىس اكىمى ارحيمەد مۇحامبەتوۆ جەرلەس اكادەميكتى مەرەيجاسىمەن قۇتتىقتادى. ونىڭ عىلىمداعى, قوعامدىق جۇمىستارداعى ەڭبەكتەرىن, ازاماتتىعىن اتاپ ءوتتى.
«كەنجەعالي ابەن ۇلى ەلباسىنىڭ سەنىمدى مەرىكتەرىنىڭ ءبىرى رەتىندە تاۋەلسىز ەلدىڭ ەكونوميكاسىن قۇرۋعا اتسالىسىپ كەلەدى. پارلامەنت دەپۋتاتى بولىپ جۇرگەندە بىرقاتار باستى ماسەلەردىڭ شەشىمىن تابۋىنا قاتىستى. اسىرەسە, ونىڭ ورتالىق-باتىس تاس جولىن سالۋ تۋرالى باستاماسى قولداۋ تاۋىپ, بەس ءوڭىردىڭ ەكونوميكالىق-الەۋمەتتىك ماسەلەسىن شەشۋگە مۇرىندىق بولدى. كەنجەعالي اعا كىندىك قانى تامعان قوستاناي وبلىسىنا ىلعي ات باسىن بۇرىپ, كوپتەگەن ىستەرگە ارالاسىپ جۇرەدى. تۋعان جەرىندەگى بىرنەشە مەكتەپتىڭ قۇرىسىنا, ماتەريالدىق-تەحنيكالىق بازاسىن نىعايتۋعا قاتىستى. امانكەلدى اۋدانىندا 3 مەكتەپ, جانگەلدين اۋدانىندا 2 مەكتەپتىڭ قۇرىلىسىنىڭ ءجۇرۋىن قارجىلاندىردى, ءوزى وقىعان اۋليەكول مەكتەبىنە مۋلتيمەديالىق كابينەتتى سىيعا تارتتى. تۋعان جەرىندەگى جاستارعا ستيپەنديا تاعايىنداپ, ولاردىڭ جوعارى ءبىلىم الۋىنا جاعداي جاساپ وتىردى. ولاردىڭ الدى قازىر قىزمەتتەرگە ارالاستى. عالىمنىڭ ازاماتتىق تۇلعاسىن قوستاناي وڭىرىندە جۇرگىزگەن ىستەرىنەن انىق كورەمىز. وسىدان ءبىر جارىم جىل بۇرىن اۋليەكول سەلوسىندا ا.بايتۇرسىنوۆقا ەسكەرتكىش ورناتىلدى. ونىڭ اشىلۋىنا ءوزى قاتىسىپ, ءوزىنىڭ ۇيىمداستىرۋىمەن رەسپۋبليكالىق عىلىمي-پراكتيكالىق كونفەرەنتسيا وتكىزدى. وتكەن جىلى عالىمنىڭ ىقپالىمەن قور قۇرىلىپ, قارجى جيناپ, شاقشاق جانىبەككە ەڭسەلى ەسكەرتكىش ورناتىلدى» دەدى ارحيمەد بەگەجان ۇلى. اكادەميكتى قر ۇعا پرەزيدەنتى مۇرات جۇرىنوۆ, جازۋشى جابال ەرعاليەۆ, اۆستريا زياتكەرلىك ينتەگراتسيا ينستيتۋتىنان كەلگەن دوكتور وسكار, تاعى باسقالار قۇتتىقتادى. ۋنيۆەرسيتەت رەكتورى حۇسەيىن ۆالەەۆ مەرەيجاس يەسىنە شاپان جاۋىپ, قۇرمەت كورسەتتى.
مەرەيتويعا ارنالعان عىلىمي-تەوريالىق كونفەرەنتسيادا عالىمنىڭ كەمبريدجدەن اعىلشىن تىلىندە جارىق كورگەن «قازاقستانداعى رەفورمالار: اناليتيكالىق كوزقاراس» اتتى كىتابىنىڭ تۇساۋكەسەرى ءوتتى. مۇنان كەيىن كەنجەعالي ساعاديەۆتىڭ ءوزى ءسوز سويلەپ, تاۋەلسىز قازاقستانداعى ەكونوميكانىڭ دامۋى, تىعىرىقتان شىققان جىلدار تۋرالى ايتىپ بەردى. كونفەرەنتسياعا اسۆتريادان, رەسەيدەن كەلگەن عالىمدار تسيفرلاندىرۋ, ينتەگراتسيا تۋرالى پىكىرلەرىن ورتاعا سالدى. وسى باسقوسۋعا جينالعان عالىمدار مەن وقىتۋشىلار ەكى سەكتسياعا ءبولىنىپ, ەل ەكونوميكاسىنداعى تسيفرلىق جانە اقپاراتتىق-تەلەۋكوممۋنيكاتسيالىق تەحنولوگيالار جانە اگروونەركاسىپ كەشەنىن دامىتۋدىڭ نەگىزى جونىندەگى ماسەلەلەردى تالدادى.
ءنازيرا جارىمبەت,
«ەگەمەن قازاقستان»
قوستاناي
سۋرەتتى تۇسىرگەن اسىلان قانحوجين
